Cavâ Barco Grándi já erguí, Noé chomâ tudo su genti co tudo laia-laia di bicho-bicho. Branco, cáfri, china, morochut, índio, tudo raça di genti sâm intrâ nacunga Barco. Cachorro, tigre, liam, zebra, vaca, chivit, bicho-saúde, tudo ilotro tamém.

Quelóra pensâ qui tem qui fazê unga viáze ui-di comprido (quarenta dia co quarenta anôti), azinha sintí unga problema: ilotro assi chipido cachipiado na Barco-Grandi … qui sábi si nádi sai filo-filo unga champurado co otrunga?? Vosotro já olá elefánti co asa-asa?? Crocodilo co pê di galinha? Porco trepâ árvre? Pantera labitâ como cacatúa?? Vosotro jâ olá qui grándi confusâm acunga-ancusa podi virâ-ficâ??

Noé qui capadóci unga cifrada já sai co unga ideia! Nacunga ânoti di começâ viáze, jâ arranjá unga saco-grándi. Cavá, chomâ ilôtro:

– Vosotro tudo uví bem-fêto! Diós querê salvâ nôs tudo. Mas nádi querê vosotro vivo unga champurado co otrunga. Porisso, atençâm: tudo macho-macho tem qui largâ su tau-tau co bola-bola na estunga saco-grándi! Quim nom larga, nádi vai co nôs!

Nim unga alma-vivo querê piâ. Tudo macho-macho obidiente qui nom pode más, azinha largâ!

Cavâ quarenta dia co quarenta anôti di dilúvio, Barco finalmente parâ na Sinai. Noé olá sol raiâ qui fórti, raganhado, abri saco-grándi tornâ chomâ tudo ilotro:

– Genti-genti, bicho-bicho! Chuva jâ parâ, nôs tudo podi sai di Barco. Agora iou chomâ vôs-sa nómi vôs vem busca vos-sa ancusa!

Assim cadunga, branco, cáfri, china, morochut, índio, cachorro, tigre, liám, zebra, vaca, chivit, bicho-saúde, tudo ilotro segui risca pa vai toma su ancusa di volta.

Quelóra chega vez di elefánti, elefánti continuâ durmido, nunca rispondê. Noé cuçâ cabeça, gritâ:

– Estunga tau co bola-bola, nom tem nómi. Sâm di quim???

Silêncio.

– Sâm di quím?? Iou conta atê três… si nádi vem, iou pinchâ na mar!.

Silêncio!.

– Unga… dôs…

De repente, tudo genti uví unga BBBZZZZZZZZ di vanda-trás Sâm mosca-fêmea goelâ pa mosca-macho:

– Mofino, qui-foi assi mono! FALA SÂM VOSSO!!

Miguel Senna Fernandes (2007)